هاد السمن بطريقة جدتي رحمها الله من اورع انواع السمن هو لي معتمد عندي وتيبقى مدة طويلة متيغمال متيعمل صوفة وشحال ما طال تيزيد يقوى ومقدار صغيرمنه كافي للتنسيم والريحة ماشاء الله تتشم من راس الدرب ههههه
المقادير
1كلج زبدة بلدية جيدة ومغسولة جيدا من اثر اللبن
زلافة ملح غليضة او ما يعدلها ملح حية وهدا افضل بكثير
قبطة زعتر طري واخرى زعيترة ان اوجدت والا فالزعتر كافي ولمكانشي الطري يستبدل بزلافة يابس
لتر ونصف ماء مغلي
الطريقة
نقيو الزعتر ونغسلوه ونشفوه ونعملوه في اناء ونزيدو عليه الملح ونصبو عليهم الماء مغلي ويغطى ويترك حتى يبرد تماما
ويصفى بحدر باش مينزلشي الرواسب لي تتكون في القعر ناخدو الزبدة ونغسلوها مزيان بالماء عادي حتى يزول اثر اللبن منها نهائي
ثم نصبو عليها مقدار كاس من المحلول ونخدمو مزيان ونزلوه ونعادو نفس العملية حتى نساليو نصف كمية المحلول
وفي الاخير نصب نصف المحلول المتبقي كلو على السمن ونغطيوه مزيان ببابييي فيلم ثم بمنديل باش ميدخلشي لو الضو ونخليوه 7ايام يتشرب ( هده العملية اختيارية لحبيتيه يجي حار والا يبات ليلة مرقد ثم يزال منهالمحلول تماما و تيخزن فساعتو )
ومنين دوز المدة نزولو الماء ديالو نعملوه في ايناء لي غادي نحفضوه فيه يكون حتى هو مشلل بنفس المحلول
ونحاولو منهزوشي الماء نهائي نهزو مقدار م ك ونزلو في الاناء حتى النهاية
ونعملو عريشات دالزعتر من الفوق
ونخزنو في مكان مظلم لمدة لا تقل عن 40 يوم وكل ما طال كل ما كان احسن وتيزيد يحرار
ملاحضة
يمكن اضافة تنسيمات عليه
- ورقة سيدنا موسى وعود سكين جبير يابس وازير بلدي ونجمة باديان وشعيرات زعفران حر هاد الشي كلو مع الزعتر والماء طايب ونفس الطريقة تيجي منسم بطريقة رائعة
وبالهنا والشفا
إرسال تعليق