نفس الطريقة تقريبا ديال الدجاج مدغمر
المقادير
5دجاجات مغسولين مزيان ومرقدين ليلة كاملة في الماء والملح والحامض وقليل هريسة وسكين جبير ومشلين مزيان وناشفين تماما
شرمولة
1/2م ك ابزار
1 م ك سكين اجبير
م ك خرقوم بلدي
لب مصيرة
الخرقوم العادي
زعفران شعرة قليل جهد شي م ص
ضامة بقري
ضامة دجاج
ضامة زعفران واحدة
6فصوص ثومة
نصف م ص ممسوحة مخلطة بسيبيسة وقعقلة -بسيبيسة اكثر من قعقلة-
م ص سمن
الماء لي يطلق شرمولة جهد كاس كبير
بصلة محكوكة للطنجرة + كاس عنبة زيت المائدة وزيت الزيتون
الملح مكيناش في المقادير متنعملوهاش
نطحنو لب لمصير والضامات ونصف السمن والثومة والربيع في الة الخلط انا تنعمل 1-2-3
ونزلو في طنجرة ونضيفوكاس الماء وباقي العطرية مع نصف زعفران الحر النصف الاخر حتى يقرب يطيب الدجاج
ونشرملو الدجاج مزيان من الداخل والخرج وما بين الجلدة واللحم ونتكوه بقطيب باش تدخل معاه شرمولة مزيان ونخليوه يشرب لمدة لا باس بها اقلها ساعتين
ونمرقو بالماء بارد حتى يقرب نصف الدجاج بقليل ونعملوه يطيب على نار في الاول تكون قوية حتى يغلي ويعاود ونزيدو ما تبقى من السمن ثم نقصوونخليوه يشرب شي 10د ثم نضيفو الزيت وبصلة محكوكة ومرةمرة نتكوه بالقطيب ونخليو حتى يطيب نصف الطياب ونضيفو باقي زعفران محكوك باليد ونفاوتو على الطنجرة لغطى باش يتشمع وميتحلشي تيجي طايب زبدة وفي نفس الوقت قابط في راسو ونخليوه حتى يبرد تماما ونزولوه من الطنجرة ويترك ينشف ونقليوه في الزيت مع م ك زبدة
الدغميرة
عملت 4 بصلات مشلدين + العطرية المدكورة في الدجاج لكن غير قليل من الحاجة منكتروش +لقناصي مقطعين+ مغرفةمرق لي طاب فيه الدجاج ونشدوعليه في كوكوط على نار مهيلة حتى طيب ونضيفوها للمرق دالطنجرة ونخليوها معرية ومنقطعوش عليها التحراك حتى تتوقف مع اضافة رشة سكر
الكبدة
تسلق في ماء وملح وقليل حامض وتغسل وتقطع مربعات وتشحر مع قليل من مرق لي طاب فيه الدجاج مع التحريك حتى توقف في الزيت مزيان وتحمر تتجي بحالي مقلية وفي نفس الكاسرول لي بقى فيه الزيت دالكبدة نشحر الزيتون من بعد ما تغسل عدة مرات
ويقدم الدجاج مزين بالكبدة والزيتون مع قليل دغميرة
اليكم الصور
الدجاج
الدغميرة
الكبدة
الطبق النهائي
نصيحة
دائما البدئ بالبسملة ودكر الله والصلاةعلى النبي
البصةنعملو النحاسية لي تتكون بابين البيضا والحمرا تتكون حلوة وتتعسل لان البيضا تطلق الماء وتتجي الاكل باسل وخصوصا مع الدجاج او اللحم والتفاية دالمناسبات
والحمرا تتكون قوية ومجهدة وتتخلي الريحة غير محببة
لكنا غادي رافقو الدجاج باللوز الزيت لي نقليو فيه اللوز نعملوبزايد باش هو لي نقليوفيه الدجاج تيجي منسم بطيبة اللوز
اللهم اجعل اعمالي خالصة لوجهك الكريم
إرسال تعليق